Informashon di embaraso no intenshonal pa Hulanda Karibense

Bai pa e chèt mesora

Plania un kombersashon telefóniko

Si bo ta na estado sin intenshon, bo por tin pregunta. E embaraso no tabata planiá i awor bo mester pensa kiko bo ke. Tin diferente eskoho ku bo por hasi ora ta trata di un embaraso no intenshonal.

E punto di informashon Embaraso No Intenshonal tambe ta disponibel pa residente di Boneiru, Sint Eustatius i Saba. Riba e página aki bo ta haña informashon tokante di opshonnan di eskoho ora ta trata di un embaraso no intenshoná i tokante di yudansa promé i despues ku bo a hasi bo eskoho.

English: Information on unwanted pregnancies for Dutch Caribbean 
The Unintended Pregnancy Information Centre is also available to residents of Bonaire, St. Eustatius, and Saba. You can find more information about unintended pregnancy and about support before and after your decision on this page. You can translate this page to English or Spanish by using the translate button on the top left of this page. For the call-back request form in English, click here. 

Spanish: Información sobre embarazos no deseados para el Caribe Neerlandés 
El Centro de Información sobre Embarazos No Intencionados también está disponible para los residentes de Bonaire, San Eustaquio y Saba. En esta página puedes encontrar más información sobre el embarazo no deseado y sobre el acompañamiento antes y después de tu decisión. Puedes traducir esta página al inglés o al español utilizando el botón de traducción en la parte superior izquierda de esta página. 

Opshonnan di eskoho

Kria bo mes

Si bo ta skohe pa sigui ku bo embaraso i kria bo yu bo mes, bo no mester hasi esaki bo so. Pidi bo mayornan, famia, amigunan òf un otro hende pa yudansa. Òf akudí serka un dunadó di kuido den bo área, manera Zorg en Jeugd CN (ZJCN) òf AKSESO na Boneiru, òf e klínika di salú di mucha (Klínika di Beibi) òf Zorg en Jeugd CN (ZJCN) na Saba pa sosten di kriansa.

Aborto

Bo por skohe pa terminá bo embaraso tambe. Esaki bo ta yama un aborto. E posibilidatnan pa tratamentu ta dependé di e largura di bo embaraso. No tin un periodo pa pensa obligatorio pa un aborto. Bo ta disidí huntu ku e dòkter si i ki ora un tratamentu por tuma lugá.

Pa un aborto te ku 9 siman, bo por opta pa un terminashon médiko di embaraso. Esaki ta konosí tambe komo tratamentu ku píldora di aborto. Tuma kontakto ku bo dòkter pa informá ken por preskribí e píldora di aborto na e isla.

Si bo ke un aborto despues di 9 siman, bo por akudí na Fundashon Mariadal Bonaire. Hábitantenan di St. Eustatius i Saba por akudí na Boneiru pa esaki riba un referensia médiko. Tuma kontakto ku bo dòkter pa esaki.

Un aborto ta posibel te 24 siman. Entre 20 pa 24 siman un tim spesialisá ta disidí si un aborto ta posibel ainda.

Mas yòn ku 18

Si bo ta ménor di edat i bo ke terminá un embaraso, bo mester di pèrmit hopi biá di bo mayor(nan) òf di bo voogd. Por hasi un eksepshon bou di sierto sirkunstansia. Bo dunadó di kuido por kontrolá si esaki ta konta pa bo.

Kolokashon boluntario serka un otro famia

Bo no ke terminá e embaraso i bo ta duda si bo por kuida e yu? E ora ei bo por skohe pa koloká e yu di forma boluntario serka un otro famia. Esei por ta serka un persona den bo sírkulo ku ta dispuesto pa tuma e yu, òf serka un famia di kriansa ku bo no konosé ainda. Den e último kaso, tuma kontakto ku Zorg en Jeugd CN (ZJCN) òf ku Voogdijraad CN, ya nan por konta bo kiko bo posibilidatnan ta. E organisashonnan aki tei pa regla kuido di e yu i di e mama ku eventualmente por ta ménor di edat. Bo tin 18 aña òf mas i bo tin e nesesidat di sosten durante e proseso, e ora ei bo por akudí na Mental Health Caribbean.

Tutela

Bo no ke terminá e embaraso i bo tin sigur ku definitivamente bo ke laga e yu krese serka un otro persona? E ora ei ta importante pa regla tutela. Komo mama biológiko bo no ta embolbí mas ku e yu. Esun ku ta kria e yu por, si esei ta nesesario, tuma desishonnan i hasi aktonan ofisial na nòmber di e yu. Pa mas informashon tokante di esaki i pa sosten, bo por akudí na Voogdijraad CN.

Bo no ke terminá e embaraso i bo ta duda si bo por kuida e yu? Hiba un kombersashon ku Voogdijraad, bo dòkter di kas, un partera òf sentro di konsulta pa beibi. Nan por konta bo kiko ta posibel den bo kaso.

Yudansa di eskoho  

Bo ta duda ainda tokante bo eskoho?

Bo ta haña difisil pa tuma un desishon tokante bo embaraso? Bo no ta e úniko! Hopi hende muhé ta sali na estado sin intenshon, ta haña difisil pa tuma un desishon. Nan ta duda tokante kiko nan mester hasi.

Bo ke atendé ku yudansa propio pa hasi un eskoho? Inskribí pa e plataforma online grátis ‘Na estado, kiko awor?’. E modulo online aki ta disponibel na Hulandes y Ingles.

Bo ke yudansa personal pa hasi un eskoho? Wak abou pa dunadónan di kuido di salú den bo área ku bo por tuma kontakto kuné pa guia bo den hasi un eskoho (sosten di desishon) pa loke ta trata bo embaraso.

Tambe ta posibel pa komuniká ku un dunadó di kuido spesialisá na Hulanda Oropeo. Esei por via telefòn, video òf chèt na Ingles òf Hulandes. Tuma kontakto ku e dunadó di kuido menshoná akibou na Hulanda Oropeo òf yama e punto di Informashon pa Embaraso no Intenshoná (wak akibou).

Fiom iHub

Registrá por via meil: fiom@ihub.nl 
Idiomanan: Hulandes i Ingles

Praktijk Myra Borkent

Registrá por via meil: info@myraborkent.nl 
Tambe bo por yama via Whatsapp: 0031-6-211 43 772.
Idiomanan: Hulandes, Ingles i Papiamentu

Kontakto ku Punto di Informashon pa Embaraso no Intenshoná 

Bo a sali na estado sin ku esaki tabata e intenshon i bo no sa kiko pa hasi? Na e punto di Informashon pa Embaraso no Intenshoná bo por akudí pa informashon tokante e opshonnan disponibel i pa un referensia pa yudansa promé i despues di bo eskoho. E personal na Punto di Informashon konosé e organisashonnan di sosten spesialisá i por dirigí bo na un dunadó di servisio ku ta kuadra ku bo nesesidatnan, tantu na Hulanda Karibense komo na Hulanda Oropeo.

E Punto di Informashon pa Embaraso No Intenshoná a keda lantá pa Fiom, e sentro di ekspertisio di embaraso no intenshoná, bou di enkargo di Ministerio di Salubridat Públiko, Bienestar i Deporte. E dunadónan di kuido ku ta referí na dje na Hulanda Oropeo ta afiliá na e ret nashonal pa sosten di eskoho pa loke ta trata embaraso no intenshoná. E dunadónan di kuido di salú aki a sigui un entrenamentu spesialisá komo dunadónan di sosten pa eskoho i ta registrá den Fiom su registro profeshonal pa sosten pa eskoho i asistensia siko-sosial despues di aborto.

Por alkansá e punto di informashon via telefon òf chèt.

Telefòn

Ta posibel pa plania un sita via telefòn. Pa motibu di e diferensia di tempu i e posibel gastunan di telefòn* pa abo, e punto di informashon ta traha ku sita pa yama bèk. E sita telefóniko por tuma lugá na Hulandes òf na Ingles. Pa un kombersashon na Papiamentu òf Spañó bo ta keda dirigí pa e dunadónan di kuido na bo isla, manera menshoná akiriba bou di 'Yudansa pa eskoho'.

Yena e formulario pa hasi esaki i un trahadó di e punto di informashon ta tuma kontakto ku bo riba e dia di bo preferensia. Bo a pèrdè e yamada? Bo ta haña un yamada bèk te máksimalmente dos bia.

* Mayoria di e proveedónan no ta kobra pa yamadanan internashonal. Bo ke sa esaki sigur? Kontrolá bo mes ku bo proveedó.

Chèt

Ta posibel pa hasi bo pregunta den nos chèt. Semper ta posibel pa habri bo chèt mas despues. Bai chèt mesora

Yudansa despues di aborto

Despues di un aborto ta normal ku bo ta sinti bo tristu, rabiá òf aliviá. Tin bia bo ta eksperensiá un di e sentimentunan hopi pisá, tin bia bo ta sinti tur tipo di emoshon. Mayoria bia e emoshonnan aki ta disparsé despues di algun dia òf siman. Pero si no ta asina, por ta asina ku bo tin nesesidat di yudansa despues di un aborto.

Bo ke kuminsá ku yudansa propio? E ayudo propio online despues di un aborto ta disponibel pa hende muhé i hende hòmber di 16 aña bai ariba i ta konsistí di vários sekshon ku ta kubri lamento, bèrguensa i tristesa, entre otro kosnan. Lo bo risibí informashon tokante esaki i por kompletá ehersisionan ku ta yuda bo atendé ku e sintimentunan aki. Bo por kompletá e ehersisionan online na bo mes ritmo. Aktualmente ta ofresé e modulo solamente na Hulandes y Ingles.

Síntomanan severo

Si bo ta sufri di síntomanan mas severo, manera depreshon òf un trastorno di ansiedat, e yudansa propio aki despues di aborto no ta adekuá. Den e kaso aki bo por tuma kontakto ku bo dòkter di kas i/òf partera pa yudansa adekuá. 

Bo ke yudansa personal pa prosesá e aborto? Akibou bo ta haña e dunadónan di kuido ku bo por tuma kontakto ku ne na bo isla.

Tambe ta posibel pa komuniká ku un dunadó di kuido spesialisá na Hulanda Oropeo. Esaki por via telefòn òf video. Tuma kontakto ku e dunadó di kuido menshoná akibou na Hulanda Oropeo òf yama e punto di Informashon pa Embaraso no Intenshoná (wak akibou).

Fiom iHub 

Registrá por via meil: fiom@ihub.nl
Idiomanan: Hulandes i Ingles

Praktijk Myra Borkent 

Registrá por via meil: info@myraborkent.nl
Tambe bo por yama via Whatsapp: 0031-6-211 43 772.